Логотип Казан Утлары
Шигърият

Әнием дәресләре

Каян беләсең, дисезме, Шулкадәр күп эшләрне?

Каян беләсең, дисезме,

Шулкадәр күп эшләрне? –

Өйрәтә мине һөнәргә

Әнием дәресләре.

Таныта ак төсләрне дә,

Таныта карасын да,

Хәрефләрне ничегрәк

Матурлап язасын да.

Гарәпчә хәрефләргә дә

Минем «тешләрем үтә».

Беләм, ничек кояш чыга,

Нидән караңгы төшә.

Умачларын да уабыз,

Токмачын да кисәбез,

Тегәбез дә, бәйлибез дә, –

Ошамаса – сүтәбез.

Биергә дә өйрәнәбез,

Шигырьләр дә сөйлибез,

Һәр «дәрес»кә йомгак ясап,

«Туган тел»не көйлибез.

Әнием өйрәтә миңа

Кем дип атарга кемне.

Әнием теле булганга

Яратам туган телне!

Әнием телендә генә

Сөйләшәм әни белән!

Туган телдәге һәр сүзнең

Кадерен, тәмен беләм, –

Тәм табам туган телдән!

Һаман саен уңга гына

Китсен дисәң эшләрең –

Өйрән син дә, тизрәк өйрән

Әниең дәресләрен!

 

"КУ" 8, 2017

Фото: pixabay

Теги: поэзия

Иң мөһим һәм кызыклы язмаларны Татмедиа Telegram-каналындаукыгыз

Нет комментариев