Гөрләвекләр
Язгы сулар ага, ярлар көлеп кала,
Кояш нурын эчә гөрләвек.
Тамчылары тере, күзен кыса бөре,
Гаҗәп тә соң яшәү серләре!
Шәфәкъ алсулана, офык балкып яна,
Гөрләп-шаулап ага кар суы.
Су өстендә чаткы, ай йолдызын тапты! –
Тылсымлы мәл – язның ташуы.
Гөрләвекләр акты, ярга учак яктым,
Төнне куып бии ялкыннар.
Мәхәббәттән шашкан, йолдызларга ашкан
Язларым бит шундый якыннар...
Үтте гомер, дисәм... Яшь бөреләр күрсәм,
И яктыра күңел түрләре:
Җырлап-уйнап ага, килеп җанга кага
Кояш нурын эчкән гөрләвек.
"КУ" 03, 2022
Фото: pixabay
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84